اختراع البروميتر
بقلم أ.د. عمرو حسن الحسني أستاذ المخ و الأعصاب
#بوست_الجمعة النهاردة عن جهاز جديد اخترعته اسمه "البِرُّوميتر"
و قبل ما تقفل من البوست و تفتكر إني هأتكلم عن موضوع في "الفيزيا" عليها من الله ما تستحق 😀
"البِرُّوميتر" ليس "الباروميتر " بتاع قياس الضغط الجوي
فكرة اختراع الجهاز ده جاتلي من مجموعة حقائق ملهاش أي علاقة ببعض بس اصبروا عليا فيها شويه🧐
١- الحقيقه الأولي: ياما كتير دخلنا إمتحانات و كنا متوقعين درجة معينة و شايفين أن الرينج ماكسيمان ٤٨ 😀و منيمم ٤٥ من ٥٠ و تفاجأ أنك جبت ٣٢ 🙄
.. و بتقولي مش هتتكلم علي الفيزيا😏 .. ده هي دي الفيزيا حرفيا😕
٢- الحقيقه الثانيه: كتير في العيادة بيجيلي مريض كان متابع معايا يقولي "معلش يا دكتور عمرو .. غبنا عنك سنتين كان عندنا ظروف..!"
أبص في الملف بتاع المريض ألاقي أنه آخر مرة زارني من ٤ سنين أو اكتر .. هو لا بيكذب و لا بيحور .. هو فعلا متخيل انهم سنتين !
٣- الحقيقة التالته: عندنا بعض المشاكل الطبيه و الامراض و الاعراض سهل نعرف قيمتها زي مثلا الضغط و السكر و نبضات القلب ..حاجات كلها رقمية
لكن في حاجات لا تُقاس بأرقام بنبقي عاوزين نعرف مقدارها او درجة شدتها .. زي درجة شدة الألم و درجة شدة الصداع و درجة الغيبوبه .. و عشان كده تم اختراع قياسات معينه لتحويل الاحساس الذي لا يمكن قياسه كميا إلي أرقام
مثلا عندنا في قياس درجة شدة الألم مقياس VAS من ١ إلي ١٠
يوريك تعابير وجه مختلفه متدرجة من ١ إلي ١٠ و باختيار أحدها تبقي دي درجة الألم عندك
🙂😐🙁☹😞😓😥😢😰😱
و من هنا جاءت فكرة اختراع جهاز "البِرُّوميتر"
٤- عبادات كتير بنعملها تستطيع إحصاءها بالكم و تقدر تعرف درجتك فيها بالتقريب قبل ظهور النتيجة في الآخرة زي الصيام و الزكاة و الذكر و الصدقة ..إلخ
يعني الصيام هتحصل علي ٣٠ من ٣٠ للرمضان الواحد و اضربه في عدد السنوات المفروض فيها عليك الصوم هتطلع درجتك في مادة الصيام
و الزكاة طلعتها بالكامل في موعدها تاخد ١٠٠ من ١٠٠ في مادة الزكاة ..مطلعتهاش تاخد صييييفر(علي رأي أستاذ مبروك أبو العلمين😀)
٥- هناك عبادات حسبتها أصعب شوية .. زي الصلاة .. من الحاجات اللي زي الفيزيا كده .. تفتكر نفسك هتجيب درجة حلوه و قد تفاجأ بالعكس
ليه
احسب لنفسك في اخر ٣ أيام مثلا
كام صلاة صليتها في أول الوقت و أحسنت وضوءها و أكملت أركانها و أضف كمان بالنسبه للرجال .. و صليتها جماعة بالمسجد
ثم اعطي نفسك ٢٠ درجه لكل صلاه أديتها بهذا الشكل و اضرب في ٥ صلوات تطلع درجتك من ١٠٠ في مادة" الصلاة"
للأسف طلعت نفس درجتك في الفيزيا .. صح ؟🙄
٦- هناك عبادات حسبتها أصعب و أصعب .. لأنها تعتمد علي الكيف و ليس الكم (زي النقطة رقم ٣ بتاعت قياس شدة الألم ) زي الإحسان و التقوي و صلة الرحم
و لذا تقدر تعرف درجتك لازم تحاول تحولها لأرقام ..
صلة الرحم مثلا .. لو فكرت فيها .. قد تفاجأ و انت فاكر نفسك واصل لرحمك إن آخر مرة زرت أو كلمت عمك كان "من كام شهر" و هو واقع الأمر "من كام سنة" زي المريض اللي اتكلمت عنه في النقطة رقم ٢
و لعله بسبب تقارب الزمان و هو أحد علامات الساعة..
٧- حتي أقرب الناس لنا قد نظن أننا عاملين الواجب و زياده و مش مقصرين خالص .. و قد نفاجأ نفس مفاجأة الفيزيا لو حولناها لأرقام 😱
زي مثلا بر الوالدين .. انت شايف نفسك حلو و زي الفل و تمام ..لكن واقع الامر انت مقصر ..مشكلة بر الوالدين الأكبر أنك مهما قصرت معاهم هيفضلوا يحبوك و يدعولك و ده يديك إحساس بأنك في مأمن و انك تمام و لكن الواقع أنك لم تبرهما حق البر
٨- و من هنا جاءت فكرة إختراع " البِرُّوميتر"
ياااه أخيرا وصلنا .. ده أنا نسيت كنت بأتكلم في ايه😀
و هو جهاز قياس بر الوالدين و وحدة القياس هي "البِرُّوجرام"
عشان تقدر تعرف درجتك في مادة بر الوالدين
نحسب الحسبة دي
للوالد أو الوالدة (أمد الله في عمرهما و بارك فيهم)
في آخر ٦ شهور مثلا
أ. بتزورهم أو بتكلمهم كذا مرة في الأسبوع ؟
ب- عارف مصاريفهم و بتساعد فيها و لا لأ؟
ج- عارف أدويتهم و أمراضهم و حافظها و لأ؟
د. متأكد أنك عمرك ما تضجرت أو تأففت أو تذمرت أو اتعصبت من خدمتهما أو طلباتهم حتي ولو كانت غير منطقيه من وجهة نظرك؟
ه. هل جبتلهم هدية قيمة ؟
و- هل تخفي عنهم ألمك و حزنك و مشاكلك عشام ميزعلوش عليك و لا معيشهم في كل مشاكلك؟
ز- هل تلين لهم بالقول و تقولهم كلام حلو يطيب به قلبهم ؟
ح- هل تقدمهما علي نفسك في المأكل و المشرب و المسكن و النفقة؟
ط- بتحرص علي انك تخرج معاهم للفسحة ؟
ط- هل تدعو لهما كثيرا؟
دول ١٠ اسئلة .. امنح نفسك درجه من ١ إلي ١٠ في كل سؤال و احسب درجتك الكلية من ١٠٠ في مادة بر الوالدين
بالنسبة للوالد أو الوالدة(لو توفي أحدهما أو كلاهما رحمهما الله)
في آخر ٦ شهور
أ- هل تدعو لهما كثيرا؟
ب- بتود الناس اللي كانوا بيحبوهم ؟
ج- هل تصل الرحم اللي مكانتش بتوصل الا بهم؟
د. هل نفذت وصيتهما؟
احسب حسبتك بالبروجرام و شوف درجتك كام
٩- الأسئله دي من واقع
الآية القرآنية "وَقَضَىٰ رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا ۚ إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلَاهُمَا فَلَا تَقُل لَّهُمَا أُفٍّ وَلَا تَنْهَرْهُمَا وَقُل لَّهُمَا قَوْلًا كَرِيمًا "
و الحديث النبوي
ثبت عنه ﷺ أنه سأله سائل : (هل بقي من بر أبوي شيء أبرهما به بعد وفاتهما؟ قال النبي ﷺ: الصلاة عليهما والاستغفار لهما ، وإنفاذ عهدهما من بعدهما ، وإكرام صديقهما ، وصلة الرحم التي لا توصل إلا بهما)
١٠ - الفرصة متاحة للكل لإختراع أجهزة أخري
إحسانوميتر.. رحميتر.. تقوميتر
انت مش أقل من أي طالب في إعدادي 🤣
حاسبوا أنفسكم قبل أن تحاسبوا
